中門大開：勾結藝術

2013年07月05日

http://hk.apple.nextmedia.com/financeestate/art/20130705/18323630

醜婦終須見家翁，上任無耐梁粉已密謀推翻新界東北官方收地模式，但一直鬼鬼祟祟，一時一樣。其實要推翻前朝政策係冇大問題，最重要係梁振英掛在口邊那四字真言：「開誠布公」，即係要有透明度，在議會內公開討論，擺事實、講道理，仲有摵甩梁粉式語言偽術。
梁粉處事為何令人不信任？關鍵在於唔大方、唔得體，古古怪怪、鬼鬼祟祟。去年6月林鄭仲係發展局局長，公開在立法會表明官府收地發展，正為了唔想畀人覺得官商勾結。要轉軚千祈唔能夠避重就輕、側側膊，反而大大方方，以公開辯論方式作交代。

東北發展三大鬼祟位

越蠱惑越鬼祟，外邊就認定梁有不可告人目的，有private agenda。東北發展修訂三大鬼祟之處包括：
1)語言偽術：去年底東北諮詢會前後，陳茂波表示可考慮私人參與，但其後梁振英在1月施政報告發表後，又表示東北官府收地冇改變。
到5月上行會前又吹風表示轉軚，但行會通過後一直冇官員出嚟解畫，等7.1之後先公佈，而最衰係運用梁氏語言偽術，稱之為「加強版傳統新市鎮發展模式」，以掩藏政府已改變了的發展原則。
2)捐地把戲：四叔捐地換取政府讓步，係外界觀感，而今年4月已傳出捐地進展良好接近埋尾。但點知到昨日至將捐地改為忽然捐畀房協，咁做就叫「欲蓋彌彰」，做得太突兀，令人更加懷疑捐地係換取公私合營之條件。古洞北及粉嶺北兩區可發展土地有333公頃，當中有162公頃為私人土地，大概三成、即48公頃會用作發展作私人住宅單位以及商業用途。陳茂波在記者會中被質疑益地產商，他也多次否認是偏袒大地產商，而且為表清白，竟然話「無資料」，唔清楚有關土地的業權。大佬，報紙都寫過晒，如果真唔知，就係白癡，如果假唔知，就係有蠱惑。
3)分段發展：另外，陳茂波解釋，被指促進「中港融合」的坪輋及打鼓嶺新發展區，暫擱置發展，主要考慮到未有完善交通配套，沒有其他考慮。真的嗎？若一次過改行公私合營，官商勾結得太明顯了，分階段實行，就分散政治壓力。
偷步入定梁粉系地產股的股民，真係要多謝陳茂波，睇怕佢民望應有反彈！

添馬男